Art Digjital – Athina & Sparta ~ 430 p.e.s. – Lashtësia me të gjitha “nuancat e detajet”!

S. Guraziu – Ars Poetica, T 2019 (Art Digjital – pak fjalë…)

lashtësia e Greqisë si djep i qytetërimit modern, ku e kanë zanafillën politika, diplomacia e demokracia, ku janë zhvilluar artet e filozofia, asnjëherë deri sot nuk është “nderuar” më bukur dhe në nivel më të lartë artistik, sesa me ndërmarrjen masive të industrisë argëtuese kohëve të fundit… imagjino të takohesh “sy më sy” me figurat historike si Platoni, Herodoti, Pitagora, Sokrati, Hipokrati… të shetisesh sheshit në Agora të Athinës, të shkosh në Lesbos tek Safoja, apo në Argolisin e lashtë, të ndeshesh ballë për ballë me një krijesë si Meduza e llahtarshme, të kesh t’bësh me Ciklopët, të tmerrohesh nga Minotauri i çartur tek të ndjek labirintit pa “rrugëdalje” 🙂

***
…vetë s’më janë dukur “argëtuese” dhe kurrë në jetë s’jam marrë me video-lojëra, por si interes për artet vizuale dhe meqë të lidhura me mitologjinë e me historiografinë, sikur isha duke e “studiuar” (ashtu sa për vete) punën marramendëse të artistëve që gravitojnë rreth Ubisoft, dhe akoma s’di çfarë të them, pasi fjala është për një punë mahnitëse – ta krijosh “lashtësinë” me specifikat e detajet historike, ta ndërtosh një botë të tërë “ndëraktive”, ta ndërtosh “lashtësinë” me të gjitha nuancat… këtë e ka bërë Ubisoft, kompania e 3-të apo 4-të më e madhe e botës sa u përket video-lojërave, kompani franceze që operon në industrinë e argëtimit me disa studio zhvilluese gjithandej nëpër botë (47 studio aneskaj rruzullit – 16.000 të punësuar), ekipeve të Ubisoft u janë nevojitur 3 vite të tëra për realizimin e projektit “Assassins Creed – Odyssey” – fjala është për qindra miliona investime, ngjarjet imagjinare të projekt-lojës janë vendosur diku rreth v. 430 p.e.s, dhe komploti na “flet” për historinë e trilluar të Luftës Peloponeziane midis Athinës dhe Spartës, mirëpo ta ndërtosh “lashtësinë” me një kualitet të tillë… ta ketë një “ndëraktivitet” gjithpërfshirës sa, përveç delirit argëtues të vetë lojës, të flasësh me një numër personazhesh historike, imagjino të takohesh “sy më sy” me figurat historike si Platoni, Herodoti, Pitagora, Sokrati, Hipokrati, Alkibadi, Arkidamusi, Aristofani, ta takosh Aspasinë e lavdishme, Euripidin, Kleonin, Demokritin, Perikleun, Fidian, Polikletusin, Praksilusin, Sofokliun, Tespisin etj. – ose të shetisesh sheshit në Agora të Athinës, të bredhësh e t’i takosh filozofët nëpër vendet historike e mitike të Greqisë si Kefalonia, Itaka, Odeoni i Athinës, të jesh para statujes së Zeusit në Olympia, të shkosh në Naksos, në Lesbosin e Safosë, në Athinën antike, në Argolisin e lashtë, në Mesara… ose imagjino të ndeshesh ballë për ballë me krijesat e famshme nga mitologjia si Meduza e llahtarshme, apo të kesh t’bësh me Ciklopët, apo të tmerrohesh nga Minotauri i çartur tek të ndjek labirintit pa “rrugëdalje” : )

[ ngjitur: sekuenca ambientale të Athinës, ~ 430 p.e.s., në kuadër të video-lojës “Assassin’s Creed – Odyssey” (2018), zhvilluar nga Ubisoft Quebec (Kanada) dhe publikuar nga Ubisoft (Francë), 2018 – mundësi e veçantë multi-mediale për ta “përjetuar” lashtësinë si kurrë ndonjëherë më parë, me asnjë formë tjetër, me asnjë medium tjetër deri sot… ]

 

[ ngjitur: sekuenca ambientale të Spartës, ~ 430 p.e.s., në kuadër të video-lojës “Assassin’s Creed – Odyssey” (2018), zhvilluar nga Ubisoft Quebec (Kanada) dhe publikuar nga Ubisoft (Francë), 2018 – mundësi e veçantë multi-mediale për ta “përjetuar” lashtësinë si kurrë ndonjëherë më parë, me asnjë formë tjetër, me asnjë medium tjetër deri sot… ]