Picasso s’do dinte me lulet në qepalla

[ picasso s’do dinte me lulet në qepalla : ) ]

…mund të pikturosh në qepallat e mia, lloj-lloj lulesh e floriadash, le të thahet ngjyrësia me freskun e me afshin, pastaj do i hap lehtas sytë, artin do e shoh pasqyruar në sytë e tu, afrohu pra… mos hezito, zhyti brushat në shpirtin tënd, ashtu siç vetëm ti di, përhumbu nënvetullës me brushat e me nuancat, mund t’ia kalosh dhe atij Pikaços, apo si quhej… ai na shtirej gjoja një “piktor modern”, me dy-tri vija shtrembalaçe vizatonte gjithandej, në letër a në përlhurë, modelet e ngrata tërë ditën në studio ndërsa ai vetë mendjen askund… me bujashka a me pakot e sfidonte imagjinatën kolazhistike, i lyente vazot a pjatat e keramikës, çfarë tjetër jo… na shtirej madje dhe skulptor, por s’do dinte si lulëzojnë lulet në qepallat e mia : )

(sg – ap, q 2021)