(S. Guraziu – AP, Prill 23 – qasje eseistike e thellë ndaj politikave të “cekta” të dy shteteve shqiptare : )
(…s’jam duke thënë se “paranoja” e Xhaxhi-Hoxhës e pati shpikur bunkerizmin, as nuk them se gjoja bunkerizmi e pati shpëtuar enverizmin, uroj ta kuptojnë politikanët ç’jam duke thënë, ose ç’kam dashur të them me esenë time…)
Nëse i sheh të “majtat” shqiptare (me diellin e sinqertë të së jashtmes), si n’Shqipëri si n’Kosovë, e kupton se janë lumturushe të kuvendeve, dominante, me logo-trëndafilash, herë vjollcë e herë vetëvendosin për të kuqen. S’ka si më bukur, mrekullia vetë, gjysmën e Parlamentit a të Kuvendit e mbajnë për vete.
Fitohet përshtypja asnjëra gjysmë majtiste s’ia bën me hile gjysmës tjetër (djathtiste), as n’Kosovë as në Shqipëri. E “ndajnë” Kuvendin përgjysmë, dhe jo vetëm… por dhe mediat “përgjysmë”, pollavrat “përgjysmë”, dallaveret “përgjysmë”, pazaret “përgjysmë”, bankat “përgjysmë”. Gjithçka përgjysmë, s’ua trazon kush as jazin as vegshin, s’u “përzihet” kush as nga jashtë e as nga brend. Fatlumësia politike s’ka si ndryshe, patjetër se të “majtat” shqiptare janë fatlume.
Thashë “përzierje”… sepse nëpër botë ka lloj-lloj çudirash, lloj-lloj padrejtësish (ose tekefundit historia ka plot çudirash). Psh. në Holandë në vitet ’70, dmth. të shek. XX, qenë bërë bashkë CIA (po, ajo e Amerikës, s’ka tjetër CIA : ) me BVD-n e Holandës dhe e patën themeluar Partinë Marksiste-Leniniste të Holandës (MLPN). Si parti politike tashmë është aso “defunct”, parti e flakur në mbeturinat, jashtë lojës politike, mirëpo sa ishte funksionale ishte aso partie ruana zot, parti mozomokeq.
Ishte diç si parti “fantomike, manipulative, mashtruese, mashtrimtare, gënjeshtare”, shkurt… parti spiunësh hesapi. Atëbotë Shërbimi Informativ i Holandës, BVD ishte diç si “CIA holandeze”, tani quhet AIVD – Algemene Inlichtingen en Veiligheidsdienst (Shërbimi i Përgjithshëm i Inteligjencës dhe Sigurisë).
Imagjino, bëhen bashkë Amerika dhe Holanda për t’ia bërë me hile të majtës… ose komunizmit holandez, shih çfarë padrejtësie politike. Imagjino, CIA themelon parti “marksiste” në Holandë dhe nëpërmjet strukturës politike për ta hulumtuar simpatinë për “leninizmin”, “maoizmin”, për “sovjetizmin”, për “titoizmin”, për “enverizmin” etj. Dmth. për t’ia bërë me hile komunizmit, booo padrejtësi historike (ndaj politikës… gjoja demokratike) sa mos pyet.
E qartë se amerikanët i kishin hallet e veta, ai Fideli i Kubës aty në “prag t’shpisë” e lëmonte mjekrën, hante llokume këmbëkryq me sovjetët. Madje për pak sa nuk qenë bërë gazi i botës me ato “raketat”. S’jam duke i gjykuar as ata e as këta (kush na qenkam unë ta gjykoj historinë, larg qoftë), thjesht desha të sqaroj se bota njeh lloj-lloj çudirash.
Ja pse të majtat shqiptare, qoftë andej qoftë këndej, sëpaku nga aspekti politik duhet t’jenë 100% “fair” me të djathtat. Për politikanët, për ata që e konsiderojnë veten “ekspert politik” tingëllon ndoshta si naivitet, por nuk është. Politikat e kanë hijeshinë e vet nëse funksionojnë ndershmërisht. T’i përziesh CIA-mendësitë në hambarin e politikave të partisë s’ka si t’jetë as “ok” as e hijshme. Të majtave shqiptare s’u kanë hije hilet politike, partitë tjera më të vogla duhet t’i trajtojnë super-denjësisht.
Ndërsa nga aspekti “historik” (meqë e përmenda padrejtësinë historike ndaj politikës holandeze), aty-këtu mbase do ishte e hijshme ta kujtojnë historinë, ta kujtojnë “paranojën” e Xhaxhi-Hoxhës dikur. Historia s’i ka “harruar” bunk-paranojat, anise populli s’merrej me të huajt, me turistët, me “vagabondët” e Perëndimit. Ku kishte kohë populli… TV s’funksiononte as për t’i kapur ndershëm këngët e Adriano Celentanos, pa le diç tjetër.
Por dhe ehuuu, ku kishin kohë vegjëlia, të zënë pas punës, pas aksioneve, të hutuar pas lumturisë, pas festivaleve të këngës etj. Ekzaktësisht njësoj diç dhe sot e kësaj dite, anise atëbotë mbase do kenë qenë më të varfër, mund t’jenë përballur dhe me skamjen. Kuptohet se mirëqenia ekonomike është më mirë se skamja, por në thelb “jeta dhe politikat” nuk ndryshojnë gjë.
Mirëpo “Sigurimi” i njihte fort mirë, me amerikanë e me gjermanë, me lulandezë e me kikirezë. Zyrtarët e sigurisë ia freskonin raportet rregullisht, çdo ditë raportet duhej përditësim sa më konciz, ndoshta dhe secilën orë duhej saktësisht. Tani s’jam duke thënë se “paranoja” e Xhaxhi-Hoxhës e pati shpikur bunkerizmin, as nuk them se gjoja bunkerizmi e pati shpëtuar enverizmin… S’jam duke shpikur ide, as duke i gjykuar paranojat historike, thjesht e përmenda si fakt. Uroj ta kuptojnë politikanët ç’jam duke thënë, ose ç’kam dashur të them me esenë time.
Mendoj se të “majtat shqiptare” të politikave aktuale s’duhet të përhumben në delirin e gjoja modernizmit, të paralizohen nga veset ego-istike, të bllokohen totalisht nga ego-sintonia rreth kampanjave zgjedhore, të bëhen gazi i botës rreth ndarjes së torteve buxhetore, të hutohen si teeepër pas ëmbëlsirave… ose le dhe t’hutohen, s’shembet bota nga kalamallëqet e politikave shqiptare, por jo të hutohen tepër shumë, aq sa ta harrojnë fare “historinë”.